System of Rice Intensification(SRI)

SRI hi buhchin dan thar a ni a, buhchi a ni lo. Kum 1983 – ’85 vel khan kristian puithiam Social Worker ropui tak Fr Henri de Laulanie, SJ-an, Madagaskar thliarkar atanga a hmuhchhuah a ni a. A hmuhchhuah dan pawh tihpalh (accident) thil mah zawk a ni. Antsirabe a farm school ah chuan an tum aia hmain buh tiak phun sawn a ngai ta a, tichuan ni 15 a upa chauh chauhte kha an phun sawn ta a, mahse a tha duhin a pengte a lo tam phian a, a thar a hlawk ta phian mai bawk si a. Chuta tanga lo lar chho ta a ni a. Madagaskar ram pawnah erawh chuan chumi hnu kum 15 zet 1999 khan a hmasa ber atan China rama Nanjing Agricultural University ah leh Agency for Agriculture Research and Development, Indonesia ten an enchhin ve tan chauh a ni.

Asia ram hi a titantu te kan ni a. Philippine, Sri Lanka, Cuba, Bangladesh, China, Cambodia, Indonesia, Thailand leh India te hi a tinasatu kan ni hriha. Heng ramah hian ti nasa tawh bawk mahse in zir chung zela uar chhoh zel a ni. India ramah chuan Rice Research Stationah chik taka zir mek a ni a, chuti chungin loneitu mipuite SRI zawm tir turin nasa takin tan an la bawk a. Govt of India pawhin a enchhinna leh mite kawhhmuhna tur (demonstration) atan sum tam tak a seng renga. Keini state tan nikum khan Rs 10.00 lakhs (Nuai sawm) kan seng a, chu chu unit 500 (acre 500) a demonstration tihna tur a ni. Kumin hian Rs 15.00 lakhs (Nuai sawmpanga) District hrang hrangah kan sem leh a. Leilet tamna district Kolasib, Champhai leh Serchhip te chu pek uar bik an ni a, nasa taka tan la tura tih an ni. Hetih lai hian district dang 5 leh Directorate pawh theihtawp chhuaha demonstration titura tih an ni ve tho.

India ramah hian Tamil Nadu, Kerela, Andra Pradesh leh Tripura te hi SRI a hma hruaitu deuh an ni a, Tripuraah phei chuan a lar tawh hle a. An leilet neitu zinga 100 a 30 (30%) laiin SRI hi an zawm tawh a report a ni. A ti apiangin an zawng chhang zel a ni awm e. Nikum kharif chhung khan Aizawl dai bul Reiek kawng bulah SRI hi enchhin a ni a. District hrang hrang Saiha, Lawngtlai, Serchhip leh a dangte atangin loneituten an rawn tlawh a. A hmu leh hria apiangin mak tiin tihve nghal ngei an tum hlawm.

SRI chungchang hi AIR (Air India Radio) Aizawl Station atangte, Doordharshan Aizawl atangte, Zoram loneitu 2008, Oct – Dec issue ah te, Tunlai Chanchinah leh nitin chanchinbu thenkhatahte tihchhuah a ni tawh a. Farmers leh Department Officers training ah te tihlan leh sawi a ni tawh thin a. Sawi tawh tih a awm lo, kan sawi zel anga, a tak pawhin kan entir zel bawk ang. Sawi nawn a nuam a ni.

National Seed Congress, January ni 18-20, 2010 New Delhi a neih chuan recommendation an siam 8 zingah SRI hi buh, buhtun leh a dang Breeder leh Foundation seed tihchhuah nan a recommend a. The Hindu Survey of Indian Agriculture 2009 ah pawh SRI hi buhthar zaa 50-100 (50-100%) a tipungtu mai nilova natna hri leh rannungte do thei zawk leh khawkheng (drought), buh tlu (lodging), thli tih chhiat (storm damage) leh a dangte pawh ti ziaawm tura sawi a ni a. Chubakah SRI tih dana an buh, lei, tui leh thlai chaw (organic) manage dan tih danglam vangin an ram, thasen, tui hman leh sum sen (capital) atanga tharchhuah a pung in a hlawk em em in a sawi bawk.

Click here to download documents how SRI works
Click here to download the origin of SRI
Click here to download the brief explanation on SRI